Gemes Rasa Kremezzz

Gemes Rasa Kremezzz

By Noer Cakrawal

"Kalau mau nulis, ya nulis aja agar lebih sering bahagia. Jangan takut jelek, ga nyambung atau idenya sederhana. Nulis kok banyak pertimbangan. Nulisnya kagak, Nimbangnya meruyak. Zonk deh. Tanpa hasil. Ha ha ha..." (Lutfi CoachLutfi)

Apa yang anda rasakan saat membaca cuplikan tulisan di atas? 

Merasa tersenggol? Atau melihat tanpa berkedip? Mangguk-mangguk tanda setuju? Atau anda menertawai diri sendiri?

Ha

Ha

Ha

"Ups, Tek Nun matiin kompor dulu. Ntar pancinya gosong lagi."

Begitu kata sang rajawali sobat. Jadi, kalau mau menulis ya menulis aja. Ngg usah mikirin orang lain. Ngapain juga dipikirin. Entah iya dia mau baca entah ngg. Sobat dah buang2 energi mikir ini dan itu.

Hellooo...cape dech

Trus saat nulis, yang dipikirin bagus atau ngg nya?

Kalau itu yang dilakukan kapan selesainya. Sampai los pun jempol ngg bakalan kelar itu coy. Malu dong sama laptopnya. Masa di depan laptop berjam-jam kerjaannnya cuma tulis-delete, tulis-delete.

Alamaaaak....mubazir itu arus listrik. Ngg sayang apa bayar listriknya cuma untuk itu doang. Mending pake untuk beli kerupuk. Kan bisa ngunyah sambil nonton sinetron TOP. Berangkaaaaat..........

Nyambung ngg, nyambung ngg...putusin aja. Ntar kalau udah baikan bakal kembali lagi. Pacaran aja bisa putus nyambung. Apalagi nulis...gimana? Masih mau ternak alasan?

Malu dong sama mie kremes yang rasanya bikin gemezzzz...

#edisigemes

#jeniuswriting

#menebarvirusbahagia

#membagienergicinta

Tek Nun Maukia Janji

#tantanganharike23
#tantanganmenulismediaguru

Tek Nun Maukia Janji
By Noer

Pagi sasudah sumbayang subuah, mangaji agak saparantian duo parantian. Babunyi lah hp tando ado pasan masuak. Dek masih duo barih lai manjalang parantian, mako Tek Nun taruih an lah sampai salasai. Sasudah tu Tek Nun tutuik jo shadaqallahul'azhim. Sambia ndak lupo mancium kitab suci ko.

Sudah tu, ba ambiak lah hp ko. Bacaliak, ruponyo ado chatt penting di lapau JW. Tatulih di situ dari Uni Irna. Kalau dari Uni nan surang ko, kalau ndak penting-penting bana liau ndak akan manshare do.

Mako Tek Nun baco balambek-lambek. Sambia manunggu aie manggalagak. Sabalun mandi Tek Nun biasonyo mangopi agak satangah lu sanak. Bia ndak dingin bana badan ko. Maklum, badan lah lamo dek bapakai. Kadang harus paham pulo apo kandak badan ko.

"Bismillah. Selamat pagi teman-teman!" Nan kecek Uni Irna jo sumangaik pagi.

Tek Nun baco jo raso kepo nan malabihi gadang badan. Baru mambaco duo paragraf, mato Tek Nun baranti sacaro mendadak. Antah apo pulo nan mambuek mato ko ma rem mendadak. Untuang sajo mati ko buatan Allah Wajalla. Kalau buatan manusia mungkin alah tapalantiang jauah-jauah.

"Apo nan tajadi Tek Nun. Mako sampai tapalantiang pulo incek mato? Kok kabantuak tu, anti ce lah mambaco tulisan Uni Irna tu." Sorak hp tilit tilit dari ateh banta.

"Baa ka indak. Caliak lah ka mari apo nan di ampok an Uni Irna ko a."

"Apo tu?" Hp tilit-tilit tambah kepo.

"Yo mandakek lah kamari." Tek Nun irik hp ko supayo mambaco tulisan Uni Irna.

🌸 J A N J I P E N U L I S 🌸

Tek Nun mambaco jo suaro paliang kareh. Tek Nun cubo mambaco bantuak urang mambaco teks pancasila.

Mandanga Tek Nun mambaco sarupo itu, takajuik lah Rogi kuciang kesayangan Tek Nun dari tampek lalok nyo.. Nyo sangko Tek Nun kok manga pulo. Tapi dek nampak dek inyo Tek Nun sadang mambaco, mundur sajo lah si Rogi cako baliak. Nan Tek Nun lanjut mambaco.

💖 1. Saya Berjanji Tidak Akan Malas
Saya akan duduk manis dan mulai mengetik. Bukan browsing atau pun stalking mantan😅

💖 2. Saya Berjanji untuk Berusaha Membuat Pembaca Tidak Bosan
Saya akan belajar memperkaya diksi, belajar bercerita lebih baik, memperbaiki PUEBI hingga tulisan saya akan jadi lebih baik.

💖 3. Akan Selalu Fokus Ketika Menulis
Menjaga kemurnian waktu menulis dengan tidak internetan tidak penting apalagi nge-scroll feed FB yang nggak habis-habis.

💖 4. Saya Akan Menghargai Hidup dan Karakter tokoh cerita.
Dengan menghargai kehidupan mereka, saya berjanji akan memberikan SIKSAAN sebaik mungkin untuk membuat mereka SANGAT gembira di akhir cerita.

💖 5. Saya Berjanji TIDAK AKAN MINDER
Saya selalu berusaha sekuat tenaga, karena itu saya tidak boleh rendah diri. Saat ini saya akan terus berproses untuk menjadi lebih baik.

💖 6. JANGAN PLAGIAT! JANGAN PLAGIAT ! JANGAN PLAGIAT!!
Ucapkan janji ke enam ini 3x lebih banyak dari janji-janji lain.

💖 7. Saya berjanji Akan Revisi dan Tidak Menyerah
Saya akan berusaha merevisi sebaik mungkin meski tidak sempurna.

💖 8 Saya Berjanji Setiap Kematian pada Cerita adalah PENTING
Saya tidak akan membunuh karakter, karena saya suka melihat karakter menderita. Saya hanya akan membunuh karakter jika memang sangat diperlukan untuk membuat cerita berjalan LEBIH BAIK lagi.

Salasai mambaco, kapalo Tek Nun langsuang pana. Karano apo nan Tek Nun baco adolah sekaligus janji jo diri sendiri.

Ndak dapek aka lai sanak, kalau janji lah ta ucap tantu harus di tapati. Kecuali kalau sanak amuah manjadi urang munafik.

Baa sanak?

Ka manapati janji atau ka mungkir? Pilihan ado di tangan sanak!

Carito manjalang mandi!

#tantanganmenulis30hari
#mediaguru

Tek Nun Pai Refresing

#tantanganharike22
#tantanganmenulismediaguru

Tek Nun Pai Refresing
By Noer

"Refresing kama Tek Nun?" Tanyo sapu ijuak nan tagantuang di balakang pintu.

"Dakeknyo. Masih sabaliak dapua."

"Tu apo acara Tek Nun?"

"Nan pasti basobok jo konco-konco nan sanasib sapanangguangan."

"Gaya Tek Nun lai."

"He..."

Kalau basobok konco ko kadang lupo jo umua sanak. Lah raso mudo lo baliak. Lupo jo status sebagai piak abu. Pokok e baok an nyo happy.

Baa ka indak. Kalau nak sarapan tingga ambiak. Lah ado nan mayadiokan. Kalau nak minum baitu pulo. Tibo wakatu makan siang, nasi jo samba lah tasadio pulo.

Ampek kali ciek semester, Tek Nun sadiokan juo wakatu untuak basuo jo kawan-kawan sanak. Kebetulan Tek Nun ditakdirkan jadi buk guru. Mangasuah-mangasuah anak urang istilahnyo.

Cuma yang bakasuah lai lah pandai ma apuih salemo. Jadi lai lah agak ringan karajo Tek Nun. Tapi sakali-sakali iyo basalemo juo. Apo lai kok hujan-hujan tangguag hari. Lah banyak nan ma eruik-eruik salemo wakatu baraja. Campua jo batuak sarato dahak. Oek...

Upsss...lari salero Tek Nun bacarito nan mode iko sanak. Walau kenyataannyo bantuak tu. Tapi kalau di sabuiķ iyo mambaliak pulo isi paruik dek nyo.

Kama-kama lah carito Tek Nun ko sanak? Bantuak ko lah kalau bacarito ndak dikontrol. Bisa malebar kama-kama.

Oke lah sanak. Tek Nun caritoan lah saketek acara refresing Tek Nun.

Sahari tadi Tek Nun refresingnyo bukan sekadar refresing sajo. Tapi refresing Tek Nun diwadahi dek MGMP Bahasa Indonesia MA se-Sumbar.

"Rami tu Tek Nun?" Tanyo raket nyamuak.

"Tantulah iyo nyo."

"Tu apo se nan Tek Nun dapek an dari acara tu?"

"Ha ha...banyak lah sanak. Partamo tantu baSobok jo kawan-kawan. Kaduo tantu manambah kapandaian. Apo nan ndak ado samo Tek Nun, ado dikawan-kawan. Istilah nan mudo-mudo kini, sharing.

Tantu apo nan ado dek Tek Nun ndak pilik pulo untuak babagi sasamo kawan do. Nyo samo jo pintu ma sanak. Amuah tulak raiah. Ndak amuah maraiah se do. Amuah manarimo, tantu harus sudi pulo untuak ma agiah. Yo kan sanak?

Itu lah kiro-kiro nan bisa Tek Nun bagi malam ko sanak. Bisuak wak sambuang carito jo tema nan lain pulo.

Selamat malam, and selamat istirahat!

#tantanganmenulis30hari
#mediaguru

Tek Nun Manggaleh Ubek

#tantanganharike21
#tantanganmenulismediaguru

Tek Nun Manggaleh Ubek
By Noer

Hari nan sahari tadi, Tek Nun manggaleh ubek sanak. Tibo di rumah langsuang tepar Tek Nun. Lah azan mugarik sajo nan manjagoan.

"Baa tu Tek Nun? Baa ko mantun?" Tanyo panyapik karateh dari ateh meja.

"Nio tau saketek atau tau banyak?"

"Kok Tek Nun lai ndak pilik ancaklah tau banyak."

"Tu kecek kamu, Tek Nun ko urang pilik?"

"Kalau itu pertaanyaan Tek Nun, tantu iyo Tek Nun nan labiah tau. Dek saya apalah, Dek Tek Nun tu nyo," jaweknyo jo bahaso indomi.

Tek Nun agak rada2 heran pulo dek panyapik karateh ko. Nampak e mulai menabuh genderang. Ciek tanyo Tek Nun, sapuluah jaweknyo. Apolah mukasuik panyapik karateh tu yo sanak?

Tapi manga pulo Tek Nun pikia kan sanak. Inyo ndak ka jadi urang juo do. Manga pulo pusiang-pusiang wak mikia an. Yo kan sanak?

Ooo sanak, masih iduik kan? Kok ndak tadanga suaro sanak?

Ooo iyo, Tek nun kan jauah dari sanak. Tapi ndak baa do sanak. Badan buliah bajauah an, asa hati lai badakek an.

Oke lah sanak. Tek Nun laporkan saketek baa carito galeh ubek Tek Nun nan sahari tadi.

Dek hari lai agak bersahabat, lai lancar sajo pajalananTek Nun hari tadi. Mulai dari awal barangkek sampai pulang.

Tibo di pasa lai lo ndaak banyak rintangan do sanak. Kapalo pasa manarimo Tek Nun jo hati suci sarato muko nan janiah.

"Yakin Tek Nun jo hati suci? Kan ndak nampak do?"

"Bia sajo lah sanak. Yang jaleh dek Tek Nun, ditarimonyo Tek Nun jo rekan-rekan jo galak manih. Kalah lo manih lansek nan ba bali duo kilo untuak pangguyah-guyah garaman lai.

Urang awak kan mantun sanak. Bara ka ramuak hati, kok tibo tamu lai juo jo muko suko batarimo. Agak ka bacakak laki bini. Kok tamu datang damai tibo sakali. Beko lah pai tamu ulang lo cakak baliak. Tantun frekuensi marabo alah agak bakurang.

Sasudah baso jo basi. Karano lokasi pasa kebetulan di Baso lo, tantu iyo agak kareh baso saketek. Sakareh tuan rumah mambasoi sakareh itu pulo Tek Nun jo rekan-rekan untuak ndak manulak paragiah an.

Sabana salut Tek Nun sanak, alun abih minum nan tahidang di meja, lapak untuak manggaleh untuak Tek Nun jo kawan-kawan lah salasai dibantangkan. Yo sabana pelayanan nan prima nan Tek Nun dapek an sanak. Antah jo apo pulo lah ka di baleh jaso urang ko. Bia lah Allah sajo nan mambaleh sanak. Ko ka dibaleh jo pitih, pitih urang labiah banyak lo dari pitih Tek Nun lai.

Nan pasa sabana rami sanak. Lai lah agak ta ubek payah. Sabana antusias urang balanjo. Galeh lai tajua sado no. Nan pambali lai tampak sanang balanjo.

Kok galeh Tek Nun jan ditanyo. Bia ndak kecewa pelanggan, basangajo nan super-super ba baok sanak. Sabana lasuah manggaleh nan sahari ko.

Mulai manggaleh pukua satangah sabaleh. Jam duo baleh lah tandeh. Baa ndak ka gadang onjak Tek Nun. Latiah-latiah saketek badan nan galeh lai abih.

"Tu lai balabo Tek Nun?"

Nan jaleh hari nan sahari tadi labiah dari labo. Mancaliak galak badarai pambali sajo lah labiah dari ubek. Jadi, baiak Tek Nun atau pun pambali samo-samo balabo sanak.

Karano nan Tek Nun galeh, bukan sumbarang ubek. Tapi ubek maundang galak nan kamek. Kok ado sanak nan sawan-sawan saketek, agak kamarilah madakek. Bia hilang rusuah jo jirawek. Apo lai panek-panek, sabana hilang sampai ka urek-urek.

Baa sanak? Lai cocok Tek Nun manggaleh ubek?

#tantanganmenulis30hari
#mediaguru

Tek Nun ka Baralek Gadang

#tantanganharike20
#tantanganmenulismediaguru

Tek Nun ka Baralek Gadang
By Noer

Bak pepatah urang Minang, "Kaba baiak ba imbauan, kaba buruak bahambauan."

Satantang judul nan di ateh, Tek Nun yo berencana ka baralek ma sanak. Kalau lai ndak ado halangan rencananyo dalam bulan kini ko.

Babarapo hari nan ka patang lah dicubo duduak baropok, untuak mambicarokan apo nan paralu disadiokan. Apo nan masih kurang. Sia nan patuik dipanggia jo siriah. Sia pulo nan paralu di imbau jo undangan.

Persiapan alhamdulillah lai sasuai jo keinginan mamak rumah. Walau ado bagisia tu lah biaso. Basilang kayu dalam tungku mako nyo api ka iduik.

Nan marusuah, kayu nan basilang kok kayu basah. Iko yo ndak kama ka di erak do sanak. Kayu basah, saluang lah tabaka pulo. Jo apo lah api ka di ambuih. Monyong muncuang buliah.

Tapi dek hari lai agak paneh-paneh tangguang, lai lah agak masiak kayu nan bacari ka patang. Mudah-mudahan hari lai bersahabat sampai alek sudah.

Nan bagian dapua lah mulai manggoreng karupuak jo jariang. Bada kariang lah ba ansua ma masuak an ka belek kaliang. Nan siriah baitu pulo, lah ba kalua an dari sumpik jo katidiang.

Nan dakek lah mulai-mulai ba imbau. Nan jauah pun lah bajalang. Kok ado sanak nan lupo ma imbau, mandakek juo lah ka alek Tek Nun. Ndak ka batulak bagai sanak do.

Salain baralek, Tek Nun tetap bukak lapak. Pisang goreng, godok, lapek bugih, jo lapek sagan. Karupuak jangek ado pulo. Karupuak jariang apo lai. Tasadio sadonyo sanak.

Sanak nan nio tarompa tangkelek, ado tasadio. Nak ba baju rayo, baju bamerek, nak kursi baru, ado tasadio sanak.

Rugi bana sanak kalau ndak datang. Kok ado sanak nan hobi badendang, buliah. Tek Nun sadiokan pentas banyanyi untuak sanak. Barabab basaluang rancak bana. Beko diiriangkan pulo molah jo randai. Nak sanang bana hati sanak.

Jan lupo tanggalnyo yo sanak. Tanggal 21 jo 22 bulan ko. Kana-kana tu sanak. Jan sampai talonsong pulo.  Jumat jo Sabtu hari nyo. Bisa gai sanak sekalian ba akhir pekan.

Kok taragak bagai sanak ba kodak jo Tek Nun, buliah. Bara patiak nio. Bakodak jo Tek Nun lai ndak mambayia do. Tapi modal bakodak tantu iyo sanak nan mamokok i.

Beko Tek Nun sadio kan pulo tampek bakodak. Spot selfie kecek anak mudo-mudo kini. Tek Nun hiasi pulo garobak manggaleh Tek Nun beko. Tanang se lah sanak. Pokok e Tek Nun usaho an, dima hati sanak nan ka sanang.

Tek Nun tunggu sanak di rumah baru Tek Nun. Yang ndak datang rugi gadang. Karano iko bukan alek sumbarang alek, tapi alek nan mambuek kaniang bakilek. Usaho samakin maningkek. Sarato rasaki kian mandakek.

#tantanganmenulis30hari
#mediaguru

Tek Nun Sawan Manulih

#tantanganharike19
#tantanganmenulismediaguru

Tek Nun Sawan Manulih
By Noer

Baa lai ko sanak, dibaliak keceriaan dan larisnyo galeh Tek Nun ruponyo ado panyakik nan sadang menyarang jempol seksi Tek Nun.

"Sakik apo Tek Nun," tanyo karabang talua dari tong sampah.

"Jan kareh-kareh bana suaro batanyo. Tadanga pulo dek urang pakak mancari pakaro sajo beko tu."

"S a k i k  a p o  T e k  N u n?" Tanyo nyo baliak jo ba bisiak."

"Malu Tek Nun manyabuik an."

" Lai ndak sakik nan banyak di cameh kan urang tu Tek Nun. Coroner bukan?"

"Husssst sumbarang sajo mah. Jauah-jauah lah panyakik nan bantuak tu. Salah sabuik lo lai tu. Corona...bukan coroner."

"Panyakik apo lo tu Tek Nun?"

"Kecek urang nan manggarati, virus tu menyarang sistem pernapasan korbannyo. Sahinggo bisa menyebabkan gangguan pada sistem pernapasan sampai bisa menyebabkan kematian."

"Ondeh bahayo mak Tek Nun. Capek lah bapareso ka rumah sakik. Talambek fatal akibatnyo tu."

"Helloooooo...jan sumbarang ka mangecek sajo kamu. Mako e danga an Tek Nun mangecek. Ndak sumbarang malantong se muncuang tu do." Tek Nun mulai agak emosi.

"Sabar Tek Nun. Hari pagi baru...jan emosi sakali. Ta ambek rasaki dek nyo tu," salo kemoceng warna kuniang.

"Oh iyo...maaf deh. Ko dek takuik nan daulu, mako e emosi se baok annyo."

Tek Nun bukan sakik sacaro medis sanak. Patang Tek Nun alah bapareso ka dokter Kalong. Keceknyo panyakik nan sadang akut kini ko cuma ciek sajo nyo.

"Apo tu?"

"Sanak kepo... ha ha ha..."

"Capek lah agiah tau Tek Nun."

"Saba lah lu. Minum bagai lah Tek Nun dulu."

"Alhamdulillah...minum alah. Sabanta sanak, ko roti ado lo di ateh meja. Tek Nun cubo agak sa gigik lu."

"Sanak alah minum atau alun? Minum bagai  lah dulu.  Jan sampai ndak minum pulo dek mambaco carito Tek Nun. Sambia-sambia an juo lah mangunyah goreng sambia mambaco."

Masalah panyakik nan Tek Nun idok an jan rusuah sanak. Ubek nyo lai masih banyak stok nyo. Selagi jempol lai ndak di kurok, aman tu.

"Maksud nyo ubek Tek Nun ampu jari bakurok?"

"Sumbarang se."

"He he he..."

Bia sanak ndak penasaran. Mari lah Tek Nun agiah tau. Apo nan sabananyo panyakik nan basarang dalam tubuah Tek Nun.

Selidik punyo selidik, rupo nyo Tek Nun sakik SAWAN MANULIH, sanak.

Sajak bilo se Tek Nun dapek panyakik tu?"

Agak duo tahun ko yo alah. Satiok hari Tek Nun harus manulih, sanak. Ndak bisa indak. Sabalum manulih ndak lalok mato Tek Nun do. Sabana parah.

Sakali sahari jadi lah. Ndak lo paralo 3x sahari do. Sarupo nan dianjurkan dokter. Tapi kok dapek sasuai saran dokter rancak bana.

Tigo tulisan sahari, bara lah ka sanang hati Tek Nun tu. Ndak bisa Tek Nun bayangkan do. Makin los jempol seksi Tek Nun buliah. Tapi los2 saketek ndak a do sanak. Asa ide di kapalo makin cetar.

Tapi awas, panyakik Tek Nun ko asli panyakik menular. Lah ado babarapo korban nan alah jadi korban.

Nan maraso tertular virus SAWAN MANULIH, silakan tunjuak tangan☝️Dan silakan pulo untuak menularkannyo ka kawan-kawan nan sa ide jo sa pamikiran😁

#tantanganmenulis30hari
#mediaguru

Tek Nun Tukang Carito

#tantanganharike18
#tantanganmenulismediaguru

Tek Nun Tukang Carito
By Noer

Sabana sanang hati Tek Nun kini sanak. Sahinggo bapangarauah ka barek badan.

Jan sanak tanyo pulo bara barek badan Tek Nun. Cukuik sanak bayangkan sajo. Bia sanak ado gambaran, bia Tek Nun agiah bocoran saketek.

Ukuran M sabana ndak bisa lai. Jikok dipasokan kateh sayuik ka bawah lah senteang pulo. Kalau L, lai suai cuma agak kurang pede Tek Nun. Ado sesuatu yang rada-rada manyumbua. XL lai suai tapi lapang stek. XXL apo lai, kedodoran.

"Tu apao sabananyo ukuran baju Tek Nun?"

"Simpulkan sajo surang yo sanak. Semakin ditanyo samakin ndak tantu jawabnyo dek Tek Nun.

Samanjak patang sampai nan sahari tadi, nan hp Tek Nun iyo agak sibuk. Ado nan bapasan buku carito pariuak anguih. Ado nan sakadar batanyo sajo.

"Batanyo apo nyo Tek Nun," tanyo tangan palsu panggawik pungguang.

"Beko lah batanyo. Gawik se lah pungguang Tek Nun lu. Agak kateh stek, a ka bawah, ka kida stek, ka suok...a tu nyo. Agak kareh stek. Aaaaa baru lasuah."

"Mamarentah ciek-ciek lah Tek Nun. Ndak tantu lo nan ka di gawik do. Beko kalau tagawik nan indak-indak, ambo ndak tangguang jawab do," protes tangan palsu nan tabuek dari plastik tu.

"Gawik se lah dulu. Tau urang sadang kaseroan. Protes pulo gau."

"Ka bagawik indak?" Protes tangan palsu.

"Iyo iyo," akhirnyo Tek Nun tapaso manyarah.

Kembali ke laptop...eh ka carito tadi mukasuiknyo.

Banyak kawan-kawan Tek Nun nan batanyo baa caro manulih. Tek Nun jawek sajo, "kalau manulih yo manulih, ndak lalok do," jawek Tek Nun sepele.

"Mukasuiknyo, baa caro mamulainyo?"

"Mangecek lah dari tadi," jawab Tek Nun.

Oke sanak., Tek Nun serius lai. Jikok sanak nio manulih, mulai lah dari yang tadakek. Ndak usah nan jauah-jauah. Misalnyo carito hiduik sanak. Carito maso ketek-ketek sangkek ba main alek-alek. Maso sakola, pernah talambek, tu disuruah nyo tagak itiak di muko kelas dek guru.

Nah, itu baru sebagian ketek carito nan sanak punyo. Sadonyo bisa sanak caritoan. Sambia mangana maso sa isuak. Jan sanak langsuang bamimpi manjadi novelis. Bisa tabaliak incek mato dek nyo tu.

Makonyo mulai dari yang tadakek dari sanak. Ndak usah nan muluk-muluk. Cukup sederhana sajo. Yang penting saat manulih sanak enjoy.

Kok sanak nio tau apo-apo sajo yang bisa ditulih, sangaik banyak sanak.

Partamo, impian dan masa depan. Apo yang sanak impikan. Nio jadi urang hebat, urang santiang, nio punyo rumah, punyo anak banyak. Atau nio masuak sarugo. Sadonyo bisa sanak tulih dalam bantuak carito.

Kaduo, perjuangan hidup. Apo sajo nan alah sanak alami sampai sanak sarupo ko kini. Bantuak carito 'Perjuangan Keluarga si Tukang Arik' nan pernah Tek Nun tulih. Bacarito baa keluarga Tek Nun berjuang melawan arus kehidupan sampai ke tahap kini ko.

Katigo, mutiara kehidupan sehari-hari. Kehidupan nan sanak jalani, itu ado mutiara yang kadang indak sanak sadari. Misalnyo basobok jodoh. Itu adolah mutiara yang ndak bisa dihargai jo pitih. Dikaruniai keturunan, kesehatan, kedamaian. Nan ndak bisa wak haragoi jo pitih. Itu bisa manjadi carito nan patuik sanak tulih.

Kaampek, nan sanak cintoi. Iko nan paliang lasuah dicaritoan. Mulai dari urang tuo, suami atau istri, anak, sampai ka kuciang bagai bisa dicaritoan. Dan ndak kan pernah habis-habisnyo untuak di caritokan.

Kalimo, yang menyebalkan. Nah, iko lain pulo garenahnyo sanak. Paliang lasuah manulih nan mode-mode iko. Tapi tantu harus pandai pulo sanak bamain kato. Jan mantang-mantang lah pandai manulih, sagalo nan buruak ditulih. Ndak buliah pulo bantuak itu do sanak. Karano hakekat seorang penulis adolah menyampaikan pesan-pesan moral ka pembaco.

Ka anam, berlian dalam musibah. Ikolah nan Tek Nun karajoan basamo kawan-kawan jewe. Balada pariuak anguih salah satu hasil berlian dalam musibah. Pariuak anguih nan lah mambuek Tek Nun dikenal banyak urang. Pariuak anguih nan akhirnyo menjelma manjadi buku nan sampai mambuek sanak tapana mancaliak cover nyo.

Itu lah carito Tek Nun malam ko sanak. Baa mako Tek Nun bisa bacarito tiok hari. Jimat nan anam tu lah nan Tek Nun praktekkan. Kalau sanak nio manulih, silakan praktek an jurus nan alah Tek Nun jaleh an tu. Selamat mencoba dan selamat bersenang-senang sanak.

Akhir kato, Tek Nun padamu sanak. I Love You!

#tantanganmenulis30hari
#mediaguru