Dek Karano

Dek Karano
By Noe

Ndak tantu nan ka di sabuik lai. Yo angek2 kapalo tek nun mambaco status tek mia. Lah samakin ndak nyaman sajo pandangaran. Nan tek nun lah mode kuciang ka baranak sajo. Puta kiri puta kanan sajo karajonyo samanjak sudah sumbayang subuah tadi.

"Manga mode kuciang ka baranak se diak?" Sapo laki tek nun.

"Caliak lak dek Uda apo nan nan ditulih dek tek mia."

"Apo tu?"

"Yo caliak lah. Mako e Uda jan main ula2 juo. Ndak tantu apo berita nan sadang viral."

"Tunggu cah. Ko ula uda sabana lah gadang ko a"

"Alah tu. Bia se lah ula tu. Uda baco lah sabanta apo nan ditulih dek tek mia."

"Tunggu cah. Stek lai a. Beko mati ula Uda."

"Ondeh mandeee....bia se lah lu. Kok mati beko adiak tolong ma iduik an baliak. Lah parang urang ula2 ka ula juo dek Uda ko lai."

Naik tensi tek Nun mamcaliak lakinyo. Nan pangana tek nun ndak ado salain ka anak bujangnyo nan surang tu. Raso2 ka batingkuluaknyo pulang. Kok dakek amuah tek nun langsuang malompek ka rumah Mak Cano.

"Udaaaaaaa..." pakiak tek nun ma imbau lakinyo.

"Iyo adiak sayangggg. Apo tu pagi2 lah heboh. Makan gai lah abuih ubi ko dulu a, beko lah olah vocal tu."

"Ndak basalero adiak mancaliak abuih ubi tu lai."

"Baa kok mantun. Lah patah salero pulo baliak. Rancak lah tu. Bia baradiak pulo Markoni. Pado langang-langang sajo awak."

"Alah mangecek tu, Da. Pado mangecek rancak haniang."

"Tu baa. Tadi basuruah uda mangecek. Lah mangecek uda basuruah pulo haniang."

Lah ribuiklah nan sapagi ko. Nan laki lah paniang lo mancaliak bini nyo nan bohay tu. Ka berang baa lah, sayang lah tatuntuang habih. Ndak ka berang pagi2nyo lah mamburansang.

Dek mode tu, mandakek lah uda tek nun. Dipaciknyo langan bini tersayang jo pacik sayang. Dalam hati, " kok bisa lah dikunyah2 antahnlah. Galigaman den. Paginyo lah ribuik co ayam ka batalua." Kecek laki tek nun sambia manahan emosi.

"Jadi apo nan ditulih dek tek mia tu diak?"

"Jadi alun juo uda baco status tek mia tu lai?"

"Yo baa uda ka mambaco. Adiak mangecek lah co patuih tungga. Ndak konsentrasi uda mambaco do. Padahal dalam hati," ndak itu pulo ka den baco do." Tapi basaba2an bia bini ko agak tanang.

Dek laki lah agak ma unjua, mako mulai lai tek nun mamcaritoan apo nan tajadi di tampek Mak Cano. Di sampaikanlah kekhawatiran ka laki. Khawatir kalau Markoni anak bujang satu2nyo kanai pangaruah nan bantuak dalam tulisan tek mia tu.

Ha
Ha
Ha

Badarai lah galak uda tek nun mandanga an carito bini. Tabayang dek inyo kalau anak bujangnyo ka batingkuluak. Baa pulo lah ka bantuak nyo tu. Anak laki-laki batingkuluak jo bagincu. Tantu batambah pulo pengaluaran mak rumahnyo. Tabayang pulo markoni ka mambali pensil alis zigzag.

"Kan udaaa...adiak caritoan nan sabananyo bukan prihatin. Malah galak nan ba pagadang."

"Baa uda ndak ka galak. Tabayang markoni dek uda basolek bantuak adiak. Tiok ka pai ndak sadang hari satangah jam ba badak do."

Ha
Ha
Ha

Akhirnyo sato pulo tek nun galak. Nan berang2 tadi lah lupo sajo. Iko nyo ka pandaian laki tek nun. Bara kaberang tek nun, kalau lah kanai rasok habih pakaro. Antah ilmu apo pulo ko lah nan dipakainyo. Sahinggo bisa mamadamkan api kemarahan nan sadang bagajolak.

#menebarvirusbahagia
#membagienergicinta