Mondok Perai

#tantanganharike_55
#tantanganmenulismediaguru

Mondok Perai

By Noer

"Mondok perai? Mode iko pandangaran emang masih ado nan perai tek nun? Nan ka iyo2 selah tulis tek nun. Jan nan ka mampakaruah suasana juo," kecek raket rangik dari ateh kasua.

"Saba lah lu. Mambaco tu salasai2. Budayakan mambaco sampai sudah. Ko ndak, nan babaco judulnyo sajo baru, nan kesimpulan ba ambiak sakali. Tu karambia cukia namo nyo tu."

"Emang karambia cukia apo tek nun?"

"Yo bantuak awak tu. Nan tau baru kulik2nyo sajo. Tapi lah ba cap pulo urang begana begini."

"Jan marabo pulo tek nun. Tanang an batin tu. Beko ndak jadi pulo sudah carito mondok perai cako."

"Astaghfirullah...mako e kamu jan bagaya sok tau pulo. Danga an lah tek nun bacarito lu."

"Jadih mo lah. Ambo manut. Asa lai perai."

"Kancang ka perai kamu mah."

"Emang tek nun ndak nio nan perai?"

"Indak bana dek tek nun tu do. Indak amuah manulak. Hik hik.."

Molah tek nun caritoan baa sabananyo mondok perai ko. Apo ko ado syarat nan harus di lengkapi. Atau mungkin sanak batanyo2 baa caro masuk pondok tu.

Tapi carito ko hanyo tek nun bagi untuak sanak. Kalau nan lain ndak ka tek nun caritoan bagai do. Karano sifatnyo agak rahasia.

"Maksud tek nun?"

"Yo agak ragu tek nun kalau sanak kurang bisa manjago rahasia ko?"

"Tek nuuun...awak janji. Insyaallah baskom wak lai ndak bocor do."

"Yakin kamu baskom kamu ndak bocor. Cubo tek nun pareso lu."

"Jan di siko lai tek nun malu wak."

"Lai ado juo malu kamu? Kecek tek nun kok lah anyuik pulo samo jo sarok kuaci cako."

"Gadang cimees tek nun ma."

"Stek"

"Capeklah caritoan tek nun lamo bana mah."

Sabananyo carito ko lah mode bola ko sanak. Oper sana oper sini. Lah ndak rahasia lai. Cuma alun sempat di gol kan sajo lai. Dek karano lah tibo pulo di kaki tek nun, yo ndak dapek aka lai. Gata2 kaki tek nun nak manyipak an. Mumpung tapak kaki tek nun lai bacilalek.

Mondok nan tek nun maksud ko, banyak urang yang menghindari. Kok dapek ma ilak, ma ilak juo baru. Tapi kadang, dek lamo bajalan banyak nan tasuo, lamo iduik banyak nan dirasai.

"Apo lah carito tek nun ko a," karak kaliang dalam belek mulai angkat bicara.

"Yo saba lah dulu. Bacarito ko samo jo mambaka jaguang sanak. Ba lambek2. Kok disabo masak tapaso kawan. Tantu ndak lamaknyo."

"Yo molah," jawek karak kaliang lah mulai bosan.

"Lai pernah sanak mandanga urang maliang kalua panjaro, sudah tu maliang lo baliak?"

"Lai tek nun. Ko sabana tajadi ko tek nun. Tetangga awak bana pelakunyo," jawek ayam jantan kukuak balenggek.

"Aaa tu baa?" Tanyo tek nun jo sumangaik 45.

"Tetangga awak tu masih mudo matah baru tek nun. Lah punyo anak hampie lo samo gadang jo inyo."

"Kalau lah samo gadang anak nyo jo inyo, ndak mudo matah namo nyo tu do. Itu mudo talampau, gaek alun lai."

"Tapek bana tek nun. Yo tau2 se tek nun nan sadang elok ko yo."

"Tantu lah iyes nyo. Capek lah salasaian carito kamu."

Awalnyo kawan awak ko tatangkok maliang induak ayam. Nan bacilok ayam sadang maram pulo, tantu heboh lah sakampuang. Ndak manunggu siang hari do, langsuang diseret ka kantua polisi.

Lah maunyi rumah ndak badapua mamak ko. Dan dapek jatah 3 bulan panjaro. Lumayan untuak mancari2 pangalaman. Nan dek keluarganyo, berharap mudah2an jadi pelajaran.

"Tunggu sabanta tek nun, minum cah lu. Tabik pulo auih dek ma ota."

"Banyaklah gaya kamu."

He..he..he...

Hari baganti pakan, pakan baganti bulan. Tigo bulan sudah mamak ko dalam panjaro. Lah sanang pulo hati bini jo anak2nyo karano sabanta lai ayah paja ka kalua dari panjaro. Walau malu jo rang kampuang setidaknyo bisa diambiak pelajaran. Apobilo mangarajoan nan salah ado akibat yg harus ditangguang.

Urang kampuang lah basanang hati pulo. Lah nampak di wajah mamak ko raso penyesalan. Dan bajanji ndak kan ma ulang karajo maliang ayam tu lai.

Kironyo iyo sanak, lai nyo tapati janjinyo. Iyo lai ndak nyo ulang maliang induak ayam maram lai. Tapi...maliang motor nan nyo karajoannyo. Ndak tangguang2 do sanak, motor nan sdg parkir di musajik nan nyo embat. Urg sdg khusuak sumbayang, nan inyo khusuak pulo mambukak stang motor nan sdg takunci.

Keren kan sanak. Batambah kapandaiannyo salamo tingga di rumah ndak badapua. Sudah lah makan perai, pengalaman batambah pulo.

Selidik punyo selidik, rupo nyo mamak ko sakamar jo kawan nan sa profesi. Tantu lah babagi pengalaman molah urang ko. Sharing istilah anak2 mudo kini.

Kiro2 mode tu lah carito 'Mondok Gratis' ko sanak. Ko ado nan minat silakan hubungi ayam kukuak balenggek. Ten nun siap2 ka pai sumbayang magrib ciek lu.

Assalamualikum.

#menulisitusedekah
#menulisitubagurau
#minangmanulih