Tabik Paluah

Tabik Paluah
By Noer

Sabana sanang hati tek nun mancaliak kulek mak cano sanak. Lai saroman nan lamo juo kuleknyo baru. Apo lai kok batamu kalio jariang...ondeh maaaak? lupo jo nan lain. Ndak ka takana bagai nan lain do. Jan kan tek mia, jo dirinyo sajo bisanyo lupo.

"Lai raso garam samba tek nun, Mak" tanyo tek nun sambia mangunyah karupuak jangek.

"Lai Nun, sabana badaceh. Antah bilo lah tek mia kau ka salamak iko masakannyo."

"Tek mia kan lai jenggo pulo mamasakannyo Mak."

"Lai. Tapi labiah jenggo tek nun lai. Labiah lamak karanyak tangan tek nun lai," jawek mak cano sambia ma apuih paluah di kaniangnyo.

Batambah barek badan tek nun mandaga pujiaan mak cano sanak. Lapeh panek2 badan dek nyo.

Apo lai mancaliak suok mak cano, ndak tangguang sanang hati do sanak. Raso di agiah pitih bakaruang jo ameh babungkah tek nun raso e.

Ko raso2 ko sanak. Tapi kok ado pitih bakaruang jo ameh babungkah tantu ndak mungkin pulo tek nun tolak do. Baa agak ati sanak, lai cucok tu?

Ndak lamo sasudah makan, lah tadanga babunyi hp mak cano. Ba video call bagai. Bacaritoan sado alah e. Mungkin lai samo tek mia tu. Tapi dicaliak kurenahnyo agak lain rauik muko mak cano. Senyum2 baa lah tu a. Payah lo tek nun manjalehkan. Tapi nan jaleh senyum bahagia.

"Yo lah Sutan. Ambo erak langkah ambo lu. Ko kawan2 lah ma imbau2 a," kecek mak cano ka sumandonyo.

"Jadih, Da. Bia lah ambo anta an uda ka hotel tampek seminar tu."

"Ndak usah sutan. Jo gojek sajo lah ambo ka situ." Nan kecek mak cano ba baso basi.

"Ndak a do Mak. Bilo lo Mamak ka naiak oto kami lai." Jawek tek nun.

"Ndak usah. Ko gojek lah mamak pasan ."

"Lah bapasan kali mak. Kok mantun ka baa pulo lai. Ndak mungkin pulo dibatalkan," kecek sutan. Dalam hati sutan, " rancak molah, ndak panek den."

Mak cano lah ma hilang dibaliak paga di baok dek gojek. Nan sutan langsung ka tabek malanjuik an hobinyo. Manciang maniaaaa...nan markonah lah sibuk pulo jo hp nyo. Tinggalah tek nun jo piriang kumuahnyo.

Mulai lah tek nun mambasuah piriang. Lah kebiasaan tek nun dari kaciak. Basarok matonyo mancaliak nan kumuah2. Sahinggo sabalun salasai basuah mambasuah alun ka kalua bagainyo dari dapua do.

Kringgg...
Kringgg...

Tadanga hp marawuang panjang. Tek nun nan sadang mancuci piriang bagageh ma apuih tangannyo jo cilemek nan masih tagantuang di lihianyo. Sudah tu langsung ba ambiak hp. Ruponyo tek mia nan manelpon.

"Assalamualaikum, Tek," kecek tek nun.

"Waalaikum salam." Sadang manga tek nun ko?"

"Ko sdg mancuci piriang tek. O iyo, pakirim etek lah sampai. Tarimo kasih banyak2, Tek." Nan kecek tek nun jo hati sanang.

"O lah tibo Mak Cano di Bukik? Yo karambie cukie laki den nan surang ko. Kalau lah kalua dari rumah ndak kan takana bininyo nan bohay ko dek nyo do."

"Bato tek, baa kok angek sakali kabel. Alun kok manelp mak cano ka etek lai?"

"Lai alun lai. Lah balangau den dek manunggu telpon, sampai kini ndak babunyi2 hp ko do."

"Bukannyo tadi mak Cano lah manelp etek. Video call nampak dek tek nun tadi."

"Video call? Jo sia?" Tanyo tek mia lah jo suaro emosi.

"Antah lah. Tadanga dek tek nun lai jo etek tadi."

"Yo kalera gadang mah. Lah mode caciang kapabeh an deyen dek manunggu telpon, rupo e nan lain pulo nan ditelponnyo. Patuiklah sibuk se hp nyo dari tadi."

Suasana makin paneh. Tek mia lah mode urang kanai sijundai. Mangecek ndak ado titik koma nyo.

Ndak bisa mangecek tek nun dibueknyo do. Ka dimatian hp kok nyo kecek an pulo tek sekongkol beko. Tantu tapaso diam se lai. 'Ah 'ih 'uh 'eh 'oh sajo lah tek nun lai. Takuik tek nun. Kok dilawan kalua pulo siampa kaleranyo beko.

Tapaso tek nun danga sajo sabanta. Lah panek kabaranti juo nyo.

"Yo lah tek nun. Ambo telpon lah sabanta lu. Ko ndak amuah di bia2 kan sajo do," nan kecek tek mia.

"Yo lah tek. Cubo lah telpon lu. Beko tek nun tolong an pulo manelpon," tek nun ba usaho maredam emosi tek mia.

"Yo, ssalamualaikum."

Hp langsuang mati. Tabik paluah tek nun mandanga an tek mia mamburansang. Antah apo ko lah nan ka tajadi ko sanak. Ndak lamak perasaan do. Ka balakang lah tek nun sabanta lu.

#menebarvirusbahagia
#membagienergicinta