Sudah Jatuah Taimpok Janjang

#tantanganharike_35
#tantanganmenulismediaguru

Sudah Jatuah Taimpok Janjang
By Noer

Disangko paneh sampai patang, kironyo hujan tangah hari.

Lah pernah sanak marasoan nan mode judul tulisan Tek Nun ko? Kalau Tek Nun iyo lai alun lai. Baa sakiknyo, rancak awak tanyo ka Upiak.

"Upiak ko sia ko Tek Nun?" Tanyo sanak.

E... alun mandanga sanak lai sia nan Upiak ko? Mandanga radio rusak alun pulo? Apo lai mambaco koran cabiak? Yo lah ketinggalan berita bana sanak ma.

Bia lah Tek Nun carito an sabanta. Manjalang-jalang mato takantuak.

Ko nan bacarito kawan Tek Nun samo manggaleh. Sabuik Sajo namo nyo Tanjidin. Sambia manunggu tukang angkek manurunan barang di kadai Tek Nun, bacarito-carito lah nyo tantang kawannyo nan banamo si Rizal.

Dek sayang si Rizal ko sangaik ta tuntuang bana ka Upiak. Maklum baru ka mancubo bacewek lah ka namonyo. Dikecek an cinta monyet ndak pulo do. Karano si Rizal ko alah agak ba umua. Satahun lai manjalang kapalo ampek.

Rupo e si Rizal takicuah di nan tarang. Antah apo nan mambuek Upiak bapaliamg hati ka laki-laki lain. Mungkinkah pitih juo nan mambuek ulah?

Antah lah sanak. Tek Nun takuik pulo ba prasangko buruak. Batambah pulo doso Tek Nun beko.

Sapanjang carito Tanjidin, yo agak tasentak Tek Nun mandanga an sanak. Saparo gilo si Rizal di buek nyo. Lah galak-galak surang si Rizal mancaliak asoy tabang.

Untuang capeknyo sadar, kok dipaturuik an yo amuah gilo. Untuang disalamek an dek kandang ayam. Maksudnyo si Rizal bausaho taranak ayam. Jadi kok taragak nyo jo Upiak, bacarito lah si Rizal ka ayam jago nyo. Antah ayam ko manggarati antah indak, nan penting beban di kapalo si Rizal lai agak bakurang.

Hari habih baganti bulan. Baitu juo bulan lah baganti tahun. Nan si Rizal lah mulai agak tanang. Hati nan luko lah mulai agak cegak. Tapi nan Upiak alun juo bangganti lai.

Ka baa lai. Untuak samantaro tapaso amak jo apak si Rizal ba saba lu. Taragak banak nak baminantu tapaso manahan diri.

Lai lah dicubo mancari pangganti dek si Rizal. Tapi satiok dicubo nan Upiak takana sakali. Kandak hati, kok dapek iyo nan sarupo jo Upiak juo. Ma pulo ka dapek nan sabantuak.

Bak kecek rang gaek-gaek, lai sarupo ndak sa parangai. Lah pasti payah mancarinyo tu sanak. Ba uban buliah dek manantian.

Namun ndak disangko2, tadanga lah kaba bahaso laki2 nan marabuik Upiak dari tangan si Rizal ditangkok polisi. Ndak tangguang-tangguang kasus nyo do, bandar narkoba rupo e. Patuik lah kayo. Tangango si Rizal mandanga an.

Mungkinkah si Rizal akan manarimo Upiak kembali?

#tantanganmenulis60hari