#TMB
Tek Nun Takuik Basuntik
Samalam nantun di kelas subalah ribuik masalah utak atik otak. Tek Nun sumangaik bana kalau masalah utak atik ko. Suko bana malah. Tapi mampadaraiannyo. Mamasang an yo manyarah.
Dek lah banyak nan datang, mako moderator langsuang mambuka acara. Dan mempersilakan pemateri manjaleh an apo nan sabana nyo utak atik utak ko.
Tapi ado nan ndak suai jo Tek Nun. Baru sajo materi bamulai, pintu batutuik sakali. Takuruang di lua molahTek Nun. Dek mode tu, mako balarilah Tek Nun ka lokal subalah. Bakatuntang di situ manjalang pintu lokal di bukak baliak.
Untuak maisi acara di lokal ko, Tek Nun bukak lah curito maso ketek-ketek. Mandanga Tek Nun kabacarito, tagaklah talingo kawan-kawan ko.
"Emang biasonyo talingo kawan Tek Nun takulai?"
"Antah lah. Lupo lo mamparatian."
Mulai lah Tek Nun bacarito.
Dulu, samaso Tek Nun manggaleh karupuak leak di pinggir lapangan sakola esde, Tek Nun paliang sanang mamparatian kapalo sakola action tiok pagi.
Cieeee, cieee..tinggi bahaso Tek Nun e...action pulo mainnyo.
Ya iya dong...
Sabalum masuak kelas, kapalo sakola esde tu taruih mangumpuan anak muridnyo di halaman sakola. Mencek alah lengkap yang datang atau alun. Yang talambek disuruahnyo babaris tapisah dari kawan-kawanyo. Sabagai sanksi disuruahnyo mangumpuan sarok sa plastik surang. Sahinggo murid-muridnyo takuik untuak talambek.
Baitu juo guru-gurunyo. Jikok gurunyo nan talambek ...
"Apo kiro2 sanksi untuak guru nan talambek tu yo?"
"Disuruah pulo mamiliah sarok ndak Tek Nun?"
"Tantu indak sanak. Di suruah pulo mamiliah sarok, luntur pulo badak viva nomor 5 nyo beko. Atau pencong pulo bulu mato anti salimbubunyo."
Guru nan talambek, anak-anaknyo alun buliah masuk kelas sampai gurunyo datang. Babaris di lua sampai gurunyo datang.
"Balaku hukum senior nampak e ko Tek Nun. Kalau senior salah baliak ka pasal 1."
Ndak dapek aka lai. Jalani sajolah dulu. Beko kalau lah panek baru di agak i pulo.
Dipagi nan sapagi tu, sasudah anak babarih, kapalo sakola ma agiah an pertanyaan ka anak muridnyo.
"Siapa yang mau hidup sehat?" Tanyo kepalo sekolah di hadapan murid-muridnyo.
"Saya Pak," jawab siswa kelas satu sampai kelas enam dengan kompak.
Mancaliak sumangek murid-muridnyo, sanang lah hati kapalo sakola cako. Batarangan baa hiduik sehat. Mulai dari caro mambasuah tangan, mandi, berpakian, dan lain sebagainyo.
Satangah jam sudah ma agiah panarangan. Matoari lah samakin tinggi juo, tantu angek. Pas lo apak ko rambuiknyo lah banyak nan rontok dari pado nan tumbuah. Mako basuruah lah anak-anak masuak ka kelàs dengan tertib.
Ruponyo, selidik punyo selidik hari tu adolah hari kunjungan petugas kesehatan ka sakola-sakola nan ado di nagari tu. Nan kapalo sakola ba usaho manyuruak an informasi supayo jan tadanga dek paja-paja.
"Baa buk lai aman," tanyo kapalo sakola ka salah surang guru padusi nan dari tadi tagak di balakang. Nan ibuk ko lai ndak guru nan acok talambek datang do. Ibuk ko rajin, kamek lo lai.
"Aman pak. Lai ndak ado nan manyabuik-nyabuik do." Jawab ibuk ko jo senyum paliang manih.
"Alhamdulillah. Rancak lah tu."
Satangah jam sasudah tu, tibolah ibuk-ibuk nan ba baju putiah. Sato tibo langsuang ka ruangan kapalo sakola.
Dek tamu lah tibo, ba kode lah ibuk- ibuk nan biaso mambuek minum dek apak cako. Tantu jo kode nan hanyo beliau nan tau jo ibuk nan kanai kode ko.
Ndak manunggu lamo, aie jo kacok lah tibo di ateh meja. Ba baso basi sakadarnyo. Sasudah tu ibuk-ibuk nan babaju putiah cako mintak izin kalua untuak manuju kelas nan alah di tunjuak.
Tibo-tibo tadanga suaro anak laki-laki basorak di muko kelas ampek.
"Ooooiiii kawan-kawan...ado buk dotor nan ka manyuntik awak, capek lariiiii....," sambie manokok-nokok pintu.
Mandanga an kato suntik, ma ambua lah paja-paja cako kalua kelas. Dak tantu nan tabao jo nan tingga. Kok nan padusi jo pakiak suaro bagai kalua kelas. Ado juo nan manangih marawuang- rawuang.
Dek lah kalibuik bantuak tu, tangango lah bu dokter tadi. Ndak jadi lah pai ka kelas. Tagak co patuang ndak barangok. (Kalau barangok ndak patuang namonyo do.)
Nan kapalo sakola cako balari mandakek ka kelas. Dapeklah surang paja laki-laki. Ba pacik an arek-arek. Ba umbuak bagai jo pisang busuak.
"Ba suntik tu dak sakik do. Raso digigik samuiknyo," nan kecek apak ko.
"Apak panduto. Baa pulo ka raso di gigik samuik, sudah basuntik tu maruyak langan dek e," jawek paja.
"Indak sakik do. Cubo lah dulu. Bia sehat badan awak."
"Pokok e indak. Awak ndak sakik do. Nan basuntik tu urang sakik. Apak nan acok sakik. Apak se lah nan basuntik."
Mandanga paja mode tu, tangango lah apak cako. Balapeh an pacik tangan anak cako. Satok di lapeh an, ijok lah paja lari. Nan apak cako ndak bisa mangaja. Karano lah ta impik lidah.
"Apo pulo hubungannyo?"
"Antahlah...antah lai ndak kram pulo utak apak tu. Bia lah nak nyo utak atik otak apak tu dek buk dokter. Tek Nun tutuik lapak karupuak leak lu. Takuik Tek Nun, nyo suntik lo Tek Nun dek apak tu bko😁😁😁
Tidak ada komentar:
Posting Komentar