HP Kawan Tek Nun Dilarian si Mony

#tantanganharike25
#tantanganmenulismediaguru

HP Kawan Tek Nun Dilarian si Mony
By Noer

"Baa sanak? Alah babaco koran cabiak?"

"Haaa... bapo pulo koran cabiak nan babaco Tek Nun? Ndak kok ado pitih pambali koran lai? Usak an bagai lah labo manjua duku patang agak sa kupia," sorak kaus kaki dari dalam karanjang kain kumuah.

"Bukan ndak ado pitih. Tapi berita nan Tek Nun carito an ko ado nyo di koran cabiak tu."

"Serius lah Tek Nun?"

"Labiah dari serius. Ndak bacaliak karuik kaniang Tek Nun."

"Lai-lai," sambia ikuik pulo mangaruik an kaniang.

"Tu dima wak bisa mandapek an koran cabiak tu Tek Nun?"

"Onde mande....kok itu pertanyaan kamu yo ndak dapek jaweknyo do. Pado pusiang-pusiang bana danga an se lah carito Tek Nun."

"Dari tadi lah Tek Nun. Kan ndak paralu pulo sato wak mangaruik a kaniang do."

Nyo mode ko sanak. Berita ko Tek Nun baco katiko pai manggaleh bajojo. Dima koran cabiak tu Tek Nun dapek an, ndak usah pulo di tanyoan. Beko ndak jadi pulo Tek Nun barito.

Manuruik kaba nan Tek Nun baco, kawan ko poi bahari minggu. Ka alam wisata terbuka.

Dek lamak carito, balatak an lah hp di ateh kurisi atau apo lah namonyo. Pokok e tampek duduak. Maklumlah sayang ko baru tumbuah, tantu dunia seraso milik beduo. Ahaiiii...kudoklah incek durian.

Dek ditampek tu ado pulo non manusia. Bantuak beda tapi kadang perilakunyo bisa sarupo manusia. Atau bisa juo manusia nan maniru parangainyo. Sabuik sajo namonyo si Mony

Mancaliak anak mudo nan bantuak tu, mandakek lah si Mony cako. Sangko urang nan duduak, nyo mintak makanan. Rupo e pai ma ambiak hp cewek nan duduak jo babang.

Dek hpnyo di ambiak si Mony, mamakiak lah cewek cako. Nan Babang bacubo mangaja. Ma pulo ka takaja, inyo sakali balari tigo kali malompek. Tantu kalah capek babang cako.

Ribuiklah urang nan ado di tampek tu. Nan ndak nio jadi korban, langsuang kalua dari lokasi. Nan pakai motor lah ma engkol motor dan langsuang pai.

Mancaliak keadaan bantuak tu, tambah kareh lah tangih cewek cako. Nan hp ndak juo lapeh dari tangan si Mony. Lah babagai caro nan bakarajoan. Ado gai nan mambae si Mony jo batu juo kayu.

"Bae jo sipatu baa nyo," kecek salah surang kawan Babang.

"Antilah. Katuju pulo sipatu dek nyo beko. Ndak ciek-ciek rugi awak. Sudah hp nyo ambiak. Sepatu lah ka jadi korban pulo. Bia lah indak." Jawek Babang jo raso takuik.

"Tu baa hp dedek, Bang?" Rengek cewek cako jo badarai aia mato.

"Baa lai. Babang ndak lo tantu caro e do."

Batambah paniang lah Babang cako. Takuik lah tibo sakali. Ka mangganti, jo apo ka diganti. Awak samo-samo mahasiswa baru. Pitih balanjo masih ma arok an kiriman urang gaek pulo baru. Iko se untuak mambao cewek, bakorban an pitih balanjo untuak saminggu.

"Tu mako e, kalau kuliah jan bacewek juo. Tangguangan lah panyakik," kecek kulik kuaci nan bamakan cako.

Dek lah nampak panik, kawan nan masih ado dilokasi sato pulo ma agiah jalan kalua.

"Bang, cubo telpon hp tu Bang. Mano tau dek babunyi hp ko takajuiknyo. Ntah lai nyo lapeh an."

"Iyo lo tu. Co dicubo manelpon."

Nan cewek cako setuju pulo. Agak badarah muko nyo mandanga an usulan urang ko. Mako dicubonyo lah manelpon dek Babang.

Kringgg...
Kringgg...

Hp nan di tangan si Mony cako tadanga babunyi. Bacaliak lah reaksi si Mony dari jauah.

Apo nan tajadi sanak? Ado nan bisa manjawek?

Tunggu lu, minum Tek Nun sabanta lu. Tabik pulo auih dek bacarito.

Ondeh sanak....bukannyo takajuik. Malah pandai pulo nyo ma angkek hp. Ko yo ndak talok manantian lai do. Bantuak nan non manusia nyo. Kiro e kelakuannyo lah mode manusia. Ragu pulo wak. "Iko monyet atau manusia?" Dalam hati urang nan ado di situ.

Mancaliak nan mode itu, lah bi kabur lah urang sadonyo. Tamasuak cewek jo Babang cako. Nan hp tapaso barelakan ka si Mony. Pasrah tapi rela judulnyo sanak.

Kabaa lai. Hari lah baransua sanjo juo. Kini lai hp nan di ambiak nyo. Ditungguan juo, kok nan kontan pulo di ambiak nyo beko. Baa ka aka lai. Ha ha ha ...

Yo lah sanak. Sampai di siko carito Tek Nun malam ko. Bisuak disambuang pulo jo carito nan lain.

#tantanganmenulis30hari
#mediaguru