Tek Nun Manggilo-2

"Ayahhh...adek ka main jo Rogi," Salsa bausaho malapeh an badannyo dari paluak ayahnyo.

"Caliak ayah talingo adek sabanta."

"Indak. Adek ka main," sambie balari kancang ka dalam rumah.

Ijon cako dek maraso penasaran baturuik i lah paja ka dalam rumah. Takuik raso ka baa talingo anak.

"Bia sajo lah inyo main. Manga pulo uda ka rusuah bana," kecek nan bini cako.

"Bapo pulo ndak karusuah. Sarancak itu anak ka pakak, apo kecek dunia gaes?

Mako heranlah bini si Jon cako. Ilang aka mancaliak kurenah laki samanjak pulang dari lapau. Biasonyo kalau pulang dari lapau tabukak kiro-kiro. Kini kok sarupo urang paniang.

Ditagah indak tatagah, mako dibia sajo malah lai. Bapalapeh sajo apo yang ka dipabuek laki cako. Dan ba yakin sajo dalam diri, bahaso ndak akan tajadi apo-apo. Nan bini cako baliak ka dapua manyudah an bangkalai nan tingga.

Ndak lamo tampak lah si Jon cako kalua rumah. Dek mancaliak laki ka pai balari lah bini ka pintu.

"Kama lai, Da?" Batanyo sambie mamacik pisau.

Mancaliak bini mamacik pisau, tasiroklah darah si Jon cako.

"Indak, ampun. Uda lai ndak ka ma ulang lai. Ampun," nan kecek si Jon jo muko rusuah.

Batambah heranlah bini si Jon mancaliak prangai laki nyo. Batanyo-tanyo molah ka badan diri. "Apo nan tajadi dek diri laki?"

Nan si Jon, mancaliak bini tangango baengkol lah honda. Baru sajo star, langsuang tancap gas.

"Udaaa...," pakiak bini sambie ma ayunkan pisau.

Jan kan ka baranti, mancaliak sajo si Jon lah takuik. Takuik bini kok malayang an pisau dari jarak jauah. Mako ba gas lah motor jo kecepatan tinggi.

Tung
Tang
Gedubrakkk...

Baru sajo ciek bengkolan, si Jon ma antak oto-oto kayu mainan cucu Tek Nun. Kecelakaan tak bisa dihindarkan. Oto-oto hancua dan ndak babantuak lai. Untuang sajo sopir langsung melarikan diri.

Amaaaaakkk....pakiak cucu Tek Nun. Manangih marawuang-rawuang mancaliak oto-otonyo rusak indak babantuak.

"Mancaliak paja marawuang-rawuang, ba katapianlah motor cako. Sudah tu ba ambiaklah oto-oto paja nan lah hancua tu.

"Baa kok di jalan bamain yuang?" Tanyo si Jon.

Nan paja cako ndak manjawek sapatah kato pun. Malah tangihnyo nan batambah kareh.

Mandanga cucu manangih, kalua lah Tek Nun bagageh-gageh.

"Manga ang manangih, Yuang," tanyo Tek Nun ka cucunyo.

Cucu cako taruih marawuang. Sudah tu nampaklah oto-oto mainan di tangan si Jon nan ndak babantuak lai.

"Eh, waang molah, Jon?" Tanyo Tek Nun.

"I i i i yo Tek," manjawek jo suaro manggaretek.

"Bia sajolah. Beko udanyo lai nan ka ma melok an tu," nan kecek Tek Nun.

Mako ba umbuak-umbuak lah cucu cako dek Tek Nun jo es potong. Supayo ndak marawuang juo. Dek cucu mandanga es potong langsuang baranti manangih.

"Baa Salsabila patang, lai ndak gelisah juo nyo lalok lai?" Tanyo Tek Nun.

"Alhamdulillah, lai ndak gelisah bana lai Tek. Sakali-sakali iyo manggarik juo nyo lalok."

"Tantulah iyo manggariknyo. Namonyo se urang iduik. Tiok-tiok nan iduik pasti manggarik," jawek Tek Nun cako.

Mandanga jawaban Tek Nun tabasuiklah galak si Jon. Tapi nan kecek urang di lapau tadi pagi masih ta ngiang-giang juo.

Tek Nun manggilo
Tek Nun manggilo

"O iyo Tek, buliah ambo batanyo ciek?" Langsung mambaranikan diri batanyo.

"Apo. Ado juo nan ka bauruik lai? Tanyo Tek Nun.

"Indak Tek. Iko maaf ambo banyak-banyak, Tek. Kalau lah lancang," jo raso takuik.

"Apo tu?"

"Tadi di lapau, urang pado ribuik mangecek an baraso Tek Nun manggilo."

"Manggilo?"

"Iyo."

"Iyo. Kini Etek sadang tagilo-gilo bana. Tagilo-tagilo menuju kewarasan."

"Mukasuik Etek?"

"Banyak na tanyo ang mah. Anguih pulo pariuak den beko." Sambie balari maningga an si Jon nan masih penasaran.

#tantanganmenulis30hari
#mediaguru