Tek Nun Bukak Lapak

Yo payah mancari pitih kini sanak. Lah sahari Tek Nun bajalan bakuliliang, alun juo habih galeh lai. Lah serak-serak badahak suaro dek basorak, nan galeh tetap juo basiso.

Baa sarancaknyo sanak? Ado usul? Tek Nun tunggu usulannyo sambia ma ansua karupuak nan balabiah ko. Dari pado mubazir di lua, rancak mubazir di dalam. Yo kan sanak?

Krrrrk...
Krrrrk...
Krrrrk...

Baa sanak, lah ado usul? Sambia bapikia-pikia kicok jo lah karupuak nan balabiah ko. Masalah bayia atau ndaknyo beko pulo wak pikia kan.

Nyo samo jo naiak oto ma sanak. Naiak gratis, turun mambayia. Dengan pitih pas tantunyo. Jan samo pulo jo tetangga Tek Nun. Naiak angkot pagi-pagi ba agiah an pitih 100 ribu ka sopir angkot. Ongkos 3000, baliak 97.000. Manuruik sanak baa kiro-kiro, baniat mambayia atau minta digratiskan tetangga Tek Nun?

Samo lo jo makan karupuak Ten Nun. Makan gratis, kalau lah ka pai tantu batinggaan bali bungkuih karupuak ko. Kalau ndak, jo apo pulo Tek Nun ka mambugkuih karupuak bisuak.

Baa sanak, lah ado usul untuak Tek Nun?

Nyo giko sanak, rencana Tek Nun ka bukalapak.com. Bia kalau sanak kabalanjo ndak payah manuruik ka rumah Tek Nun. Ndak payah manantian-nantian Tek Nun lalu di muko rumah sanak. Bisa dipasan jo hp rancak sanak. Tingga manunggu se di rumah lai.

"Rancak lo tu yo?"

Iyo lah. Ma amuah awak kalah jo nan mudo-mudo. Kok nan mudo-mudo kini hiduik sabana sanang. Mambali karupuak kuah sajo lah online kini. Apo lai mambali barang mewah. Ndak paralu pai bana ka pasa do. Dari kamar mandi sajo bisa.

Tapi baa caronyo yo sanak? Tantu harus bali hp rancak pulo Tek Nun dulu. Samantaro hp Tek Nun cuma hp tililit tililit. Kok manelp urang balarian ka pamatang sawah cah. Kalau ndak, mode dalam aia suaro urang tadanga. Mangalambuang-galambuang. Cubo lah Tek Nun tanyo ka yayang Tek Nun lu. Lai ko lah ado labiah pitih manjua jawi patang.

"Udaaaa...oi udaaa," jo suaro lamah gamulai. (Kudok lah galamai Tek Nun. Ha ha ha)

"Apo juo lai?"

"Bapo marabo kali, Da?"

"Ambolah hafal bana gaya bini den nan surang ko. Kalau suaronyo lah mode galamai bagalintin, pasti ujuangnyo UUD."

"Maksud Uda?"

"Jan pura-pura lo lai. Ngaku se lah."

"He he he, i y o, Daaa. Tek Nun sayang Uda," sambia mamacik tangan uda co urang ndak ba urek. (Lutok lah incek durian Tek Nun, ha ha ha)

Dek pandai marayu, mako lintuah juo lah hati uda Tek Nun. Alhamdulillah dapek kandak hati. Tek Nun bali hp baru. Ndak tangguang sanang hati do. Onjak kida onjak suok sajo karajo samanjak ba hp baru. Lah bantuak kacang di abuih ciek sajo Tek Nun.

Rupo e hp sajo nan rancak. Mamakai indak pulo pandai. Satiok sabanta mamakiak mandanga hp banyanyi surang. Co urang dikaja anjiang gilo ma agiah an hp ka uda.

"Anti se lah ba hp kok ka bantuak urang gilo," nan kecek uda Tek Nun.

"Jan mode tu bana Da. Beko ganti-ganti wak mamakai," jawek Tek Nun ma umbuak-umbuak.

Dek tiok hari pakai hp kini lah agak maggarati Tek Nun baa mamakai hp ko. Lah mulai pandai ba pacebook. Tiok sabanta galeh ba foto. Tu ba posting. Sampai-sampai mual pulo urang mancaliak.

"Baa kok bantuak tu?"

Baa pulo ka indak. Lai ado juo karajo di rumah tu ba masuak an ka pacebook. Sampai-sampai ayam bacewek punbamasuak an juo. Parah-parah...

Tapi iko lo untuangnyo sanak. Samanjak pandai ba pacebook ko lah banyak urang nan kenal jo Tek Nun. Lah banyak nan koment postingan Tek Nun. Nan biaso ma las basi, kini lah rajin koment. Yang biaso ma utak atik laptop lah sato pulo basorak-sorak.

Rami sanak. Rugi kalau ndak sato. Mandakeklah. Tapi jan rapek bana. Ingat! Bukan muhrim.

Ok sanak. Sampai di siko carito Tek Nun malam ko lu. Bisuak wak sambuang jo carito nan lain pulo. Dan izinkan Tek Nun bukak lapak. Mano tau ado nan butuh informasi. Mokasi sabalumnyo sanak.

#tantanganmenulis30hari
#mediaguru