Tek Nun Kanai Bom Panci

#tantanganharike17
#tantanganmenulismediaguru

Tek Nun Kanai Bom Panci
By Noer

Onde sanak, iyo sadang tabedo bana Tek Nun. Baru sajo pulang bajojo lah kanai bom. Ndak dapek ma ilak lai. Suok kida manantian.

"Apo nan tajadi Tek Nun?" Sorak tetangga subalah rumah.

Dek sadang pana bana, alun tajawek tanyo tetangga lai. Antah apo pulo penilaian tetangga, beko pulo Tek Nun pikia an. Tek Nun salasaian pakaro bom ko dulu.

Hati Tek Nun baru ka sanang baru sanak. Baa dak ka sanang dek sanak. Galeh habih pitih dapek pulo. Mako badendang-dendang ketek se lah Tek Nun manundo garobak.

Lai ado juo urang nan basobok di jalan, Tek Nun sapo sadonyo. Sampai-sampai urang gilo basapo juo. Mode itu bana sanang hati. Untuang sajo urang gilo nan basapo tadi ndak manggarati, kok manggarati tantu lah lain pulo caritoyo.

Dari jauah lah tampak rumah Tek Nun. Lah tabayang pulo aie dingin dalam kulkas. Samakin basumangaik Tek Nun manundo garobak. Lah raso di bibie tapi cawan. Hari iyo paneh-paneh tangguang lo.

Tapi, malang ndak dapek di tulak mujua tak dapek diraiah, ba bunyi lah hp dalam saku. Tek Nun caliak, ruponyo ado berita nan mambuek hati jo perasaan Tek Nun tabang ka langik.

"Bahayo tu Tek Nun?"

"Bahayo bagi urang nan ndak amuah mancubo."

"Apo tu Tek Nun?"

"Nio tau atau nio tau bana? Tek Nun yakin pasti sanak nio tau bana."

Ruponyo, berita nan lah lamo Tek Nun tunggu-tunggu juo.

"Apo tu?"

Iko aaaa...carito pariuak anguih Tek Nun sabulan nan lalu, lah kalua pulo covernyo. Tek Nun sangko ndak ka ditarimo penerbit, ruponyo katuju pulo dek urang ko.

Yo ndak tangguang sanang hati do sanak. Raso
kanai bom panci raso e. He...

"Lai pernah sanak kanai bom panci?"

Kalau alun, mandakek lah kamari. Nak Tek Nun agiah an jampi-jampinyo. Bia sanak maraso an pulo baa raso kanai bom panci ko.

Ok lah sanak. Sampai di siko sajo carito awak dulu. Tek Nun ka mambaco 'Balada Pariuak Anguih' sabanta lu. Kalau lah sudah beko Tek Nun caritokan pulo ka sanak.

#tantanganmenulis30hari
#mediaguru